|
السلام عليكم …
حايشني احباط وظيفي .. !! وغالبا .. من الصعب جدا يحوشني احباط وظيفي .. !! تتوقعون هالشعور انا مختلقته ؟؟ او انا تخيلته ؟؟ او اني توهمته ؟؟ المفروض مو هذي الهقوة فيني … عدل ويلا انا غلطانه ؟؟ انزين خل اقولكم واسولف لكم … وبقولها كقصة .. وانتوا راح تحسون فيني -=- دخلنا الكلية انا وصديقتي ( التربية الأساسية ) انا تخصصي صار رياض الأطفال … وصديقتي تربية بدنية وتخرجنا من الكلية .. معدلي فوق ال 3 نقاط .. واهي معدلها يمكن 2 ونص او اكثر بشوي .. حلوو ؟؟ حلوو لكل مجتهد نصيب دخلنا وزارة التربية … انا بتخصصي … بالروضة .. واهي بالابتدائي كنت لما امرض اتحامل على نفسي .. واحضر لمصلحة العمل .. وكانت اهي اذا مالها خلق تغيب وكنت آخذ امتياز .. واهي تاخذ امتياز .. لين ياه ذاك اليوم اللي صارت فيه رئيسة قسم ( الله يوفقها يارب والفال للكل ) وانا تميت بمكاني … واتوقع عقب جم سنه بتييها وكاله … وانا مكانك راوح !!! تدرون ليش ؟؟ لانه معلمة رياض الأطفال .. ما تشم ريحة الترشيح للاشراف الا عقب خدمه عشر سنوات … يعني بالسنه الحادية عشر !! -=- لما اسمع عن مدسة خدمة بالوزارة عشرين سنه .. وما تحركت عن كونها معلمه .. احس انه حلاته الواحد يسوي اللي عليه .. ويخلص لرب العالمين .. وبس يوصل سن التقاعد يستمتع بحياتة العائلية والاجتماعية وعلاقاتة الانسانية واهله واللي حوله .. ويتمتع بصحته وعافيته .. -=- كل عام وانتم بخير … بمناسبة العام الهجري اليديد .. عسى الله يجعلنا فيه من السعداء الراضيين المرضيين … اللهم آمين |