تخاريف تربوية .. (21) { المدارس باظت يا جدعااان }

((فاروق جويده))

* * للحيني أموت من الضحك وأنا أشاهد مدرسه المشاغبين، كنت في بدايه طفولتي واشوفها .. وأطيح من الضحك مع قفشات عادل امام وسعيد صالح .. وهبال يونس شلبي ..!!

عادل امام ينسئل عن المنطق يرد .. أبوي موصيني اني ما اسولف عن أحد وهو مو موجود
ولما تبدا تعصب عليه الابله .. وتأمره بالوقوف .. يقول بكل بجاحه ..
بتؤلي أأف.. ؟
بعد 14 سنه خدمه ف ثانوي تؤولي أأف
وينهيها بأجمل كلمه .. المدارس باظت يا جدعااااان ..!!

عجييييييبه بكل مشاهدها .. كنت اشوفها وما توقعت اني بكون مكان أستاذه عفت .. واواجه امثال بهجت الاباصيري ومرسى الزناتي!!
كنت اتساءل بعقليه الطفل.. صج في ناس جذي؟؟!
معقوله الاستاذ توصل فيه مرحله انه ينجن ويبدا يفصخ ملابسه .. بحجه انه ((كل ما تلائي حاجه في طريئك اقلعها))

ومعقوله في طلبه يفجرون الصف ويمصخرون الناظر بهالطريقه …!!؟
ومعقوله في طلبه بهالمستوى الدراسي والاستعباط اللي حتى كلمه ((من)) تنكتب بتلك الطريقه

وبعد ما دشينا هالسلك التربوي بدينا نشوف نمونات ما تتسولف ..
عقليات تحط العقل بالكف ..
عالم ما يمشون بالتربيه او بالطرق التربوية المعتاده ..

كمعلم .. يكون مطلوب منك العديد من المهام طول السنه .. وتبحث في اثناء تلك المهمات عن عقليات بشر صافيه تعمل على تقويمها وتحسينها ليكونوا جيل المستقبل!!

خلوني أتكلم عن الجهراء السعيد عشان لا يقولون قاعد أعمم!!

90% من الطلبه اللي عندنا هم الدراسه اخر همومهم ..
80% من الطلبه يدخنون
70% من الطلبه يسهرون لوجه الصبح
60% من الطلبه يعتبرون المعلم .. كماليه من كماليات الفصل
50% من الطلبه يشيلون تلفونات داخل الفصل
40% من الطلبه ينامون بالفصل
30% من الطلبه يحترمون المعلم
20% من الطلبه يذاكرون على الاقل مرة بالاسبوع
10% من الطلبه ودهم ينتقلون من بؤرة الفساد اللي عايشين فيها
1% من الطلبه .. يطلع فيه خير ويصير دكتور بالمستقبل!!!

احصائيه ابتدعتها أراها محقه .. ومنطقيه ..

كيف نصلح حال عيالنا ..؟

اذا النظام لازال يحبو .. ولا نرى بارقه أمل تلوح بالافق تقدم لهالجيل الحلول السليمه ..
اذا فكرنا كمعلمين أصبح منوط باعمال بعيده عن التدريس .. والنصاب كل ماله يزيد !!
اذا الادارة صارت تربيط عصاعص -سوري على الكلمه- وواسطات . . وحب خشوم!!
اذا التربيه في البيت صارت ضربا من الخيال !!

لا واللي يقهر …

100% ممن كانوا بالصف الثاني عشر … نجحوا من الدور الاول السنه الماضيه ..
و96% من طلبه العاشر نجحوا من الدور الثاني …
و5 طلبه ما قدموا امتحانات الدور الثاني … سقطوا … وانا متاكد انهم لو كلفوا على حالهم شوي وقدموا الاختبار كان نجحوا!!

اووووووووف انا شقاعد اقول ..
زله لسان سوري.. ما قلت شي؟!

–المدارس باظت ياجدعااااان–

ت ح ي ت ي