|
السلام عليكم و الرحمه
بعد فتره طويييييييييييييييييييله من الغياب و القصور ارد لكم بباقة يديده من المواضيع
اول شيء احب اعتذر لكل اللي ما قدرت ارد عليهم او وعدتهم و ما قدرت اوفي انا اسفه و حقكم علي لكن تأكدو انه كل هذا كان لظروف الدراسه و الكليه للي ما يعرفني وللي نساني احب ارد اعرف بنفسي قبل لا ابدي موضوعي
انا طالبه من مركز العلوم الطبيه سنه اولى خريجة عام 2024 من العشره الاوائل على الكويت ( ماشالله لا اله الا الله ) صاحبه قروب طموحنا طب و مواضيع كثيره عن الطب . طموحي اصير دكتوره طوارئ ادري انه تخصص صعب على البنت بس انا اعشقه و اعشق الطب و باذن الله راح اوصله .
واللحين اقدر ابدي موضوعي
ييتج يا الطب بصمت الخطوات
بامل بتفاؤل و بعد سهر ساعات تقدمت و انا باذن الله ضامنه الدرجات بس كسرت فيني كل زاويه فيج وريتيني منعطفات الحياة كانت لي قصة نجاح بس بسبة البدايه فيج كل شي راح بس اللحين ارد و اقول حب الطب شي بقلبي مو معقول وبعد كسرة طحت فيها و ونييت كاني اللحين اقولج ردييت رفعت راسي من يد ويديد وابتسمت و قلت في فجر سعيد شديت حيلي وقلت طموحي الطب اكييد كل من قالي صعب كل من قالي شديد لكن دام النبض يحبج عن طريجج ما احييد
اسمحولي على الخاطره الصغيره بس بالفعل هالخاطره اختصرت حياتي بكورس كامل
اتوقع الكل اللحين بيخاف ويقول دارك المتفائله طاحت و الخ ..
بقولكم كلمه وحده ..
الطب عشق و لكل جواد كبوه و الحياة تنتظر لها بكل طريج ظلمه نهاية فيها نور ..
الطب مو صعبه .. مو جحيم .. مو موت ..
الطب حلوه للاقوياء .. عندك طموح و قوة اراده راح تبتسم و تعدي بكل سهوله ..
كلنا انهارت اعصابنا بسبة التغيير وهذا شي طبيعي بكل الكليات لانه حياتك تتغير ..
بس تدرون شنو الحلو بكليتنا .. كلنا عايله وحده .. كلنا قلوبنا على بعض ..
في منافسه و في تصفيه ما اقول لأ بس والله الطريقه اللي الكل يخاف فيها عليك و شلون الكل يساعدك و يحاتي درجاتك بشكل مو طبيعي شي يفرح القلب ..
كليتنا تنعشق اي تنعشق ..
تنحب اي تنحب .. تنكره .. والله ما تنكره .. على الطراقات اللي خذيناها بكل طراق صرنا اقوى ..
دشينا ناس عاديين .. بكورس واحد شخصياتنا انقلبت ..
العصبي صار هادي ..
اللي يتنرفز صار بارد .. اللي يبجي من اول طراق صار يتحمل ويتحمل كل ضغوط الحياة .. صرنا اقوى بكل ما تحمله الكلمه من معني …
اللحين بتقولون الله كل هذا الطب تسوي يا عمي ابعد عن الشر وغنيلو .. و شنو الطراقات اللي خذتها و غيرتها 100% ..
سؤال واحد ..؟
تحب الطب .! تعشقه .! ولا داشه عشان فلان و علنتان و كلام الناس ..
اذا تحبه صدقني بتكمل .. و بتعشق الطب بكل طراق تاخذه اكثر واكثر و بتصير انسان اكثر من ما تكون فلان .. راح تعرف تتحكم باعصابك .. يضرك احد مجرد انك تبتسم و تترفع عن سفاهته .. واتوقع هذا اللي نحتاجه من دكاتره .. تقدر نفسية مريضك و اللي جدامك .. وتكون انسان راقي قبل لا تكون دكتور .. تعصب بسرعه صدقني بتصيير ثلج .. تخاف بتصيير فاندام ( على قولة طالب عندنا ) كل هالصعوبات بتعدييها بابتساامه وانت قلبك ينبض لشي واحد .. اهوا الطب تبي الطب لفلوس و منصب ومركز بدون لا تحبه ..
بتعدي ما اقولك ما راح تعدي ..بس صدقني راح تتعب وراح تتحطم وعلى قولة دكتوري الانجليزي راح توصل لمرحله تسأل نفسك is this the life i want ? الطراقات اللي خذيناها ..:
كطلبه سنه اولي او سنه التصفيه نفس ما يسمونها عانينا من وايد اشياء
1) الانجليزي عليه ثلث المعدل ..
احنا طليه حكومه وباختصار خريجيين منهج انجليزي فااااشل بكل معني الكلمه .. احنا بالثانويه تعلمنا شيين الكد و الحفظ كانوا يكدوونا عدل و فوق هذا ننشق شق بالامتحانات و اتوقع امتحاناتكم اللحين اصعب على اللي اشوفه من معاناة اختي .. اما الحفظ فحدث ولا حرج ييبلك 150 سؤال ست بوك و يقولك احفظ ..انزين انا تخرجت من الثانوي خريييج حفظ منهج انجليزي ما تخرجت انسان يعرف يرصص كلام بالانجليزي صراحه و باختصار انا لولا الافلام والكتب اللي اقراهم جان انا ما اعرف غير جم كلمه ما اعرف ارصصهم .. مع احترامي للكل بس انا وحده ما درستني مدرسة انجليزي سنعه الا من رحم ربي .. المهم احنا بالثانوي اللسننج ما عندنا و لو عندنا مره او مرتين بالكورس .. الرايتنج هذا الشي الوحيد اللي نتعلمه مع انه ما يسوولنا براكتس واايد اما الريدنج فهذا الشي السنع الوحيد اللي تعلمته صح من الثانوي .. باختصار اذكر كنا ندرس دروس ومعلومات ماكو شي اسمه شلون تتكلم او شلون تسمع و اتوقع الانجليزي كل اللي نبيه انه نتكلم و نكتب ونسمع احنا كافينا المعلومات اللي كنا ناخذها .. المهم من هذا كله انه لمن دشينا الانجليزي مال الطب او (انجليزي 181 ) .. كنا نعاني من مشكله وحده الرايتنج اللي غيير و اللسننج اللي عمرنا ما تتدربنا عليه .. فكان الانجليزي مطبة عيال الحكومه .. ( راح اتكلم اكثر عنه بموضوعي الياي ان شالله عن مواد الكورس الاول )
2) الضغط النفسي و ضغط الوقت ..
بالطب في شي غريب انه مو احنا اللي ما نبي ندرس مشكلتنا انه ما عندنا وقت عشان ندرس ..وغير الضغط النفسي لمن تشوف الكل يدرس وانت ما عندك وقت .؟! وتصير حياتك غيير
3) تنظيم الوقت ..
الوقت . الوقت الوقت اهوا المشكله الوحيده بالطب مو الدراسه مو الكميه .. الوووووووووووقت ..
نصيحه وحده نظم وقتك من الاول و راح ترتاااااااح .. يتبع يرجى عدم الرد
|