السلام عليكم ورحمة الله وبركاته
طبعاً فتحت هذا الموضوع لأن عارف بعد جم يوم بنخلص دراسة وراح تطلع النتايج!
وهذا الموضوع راح اخص فيه طلبة الـ12 والـ11
يمكن لما الحين محد فكر فيها .. وقال ان هذا النظام ضيع شكثر من الناس؟
بعد الاعلان عن نسب قبول الجامعات قبل جم يوم كثير من الناس ضاعت امالهم
وصراحه قاعد يطلبون نسب خيالية الجامعات !
كلية الهندسة تبي نسبة 84% (علماً بأن كانت تطلب 80% ايام المقررات) جم واحد فينا مجتهد هني ومعدله (غير الوزن النسبي) فوق 84%!
اييك وزن نسبي توزيعه (غبي) يحسبلك مادة العربي الي الله يسامح موجهينها يخلونها اعلى مادة بالوزن النسبي فتجد نسبتك لا تتعدا الـ82%! على اي اساس اخترتوا مادة العربي؟ واحد نفسي علاماته زينه بكل مواد العلمية ما عدا العربي الي كله حفظ ودراسته شبه خياليه 4 كتب وما ايي منها شي بالامتحان !
وهناك ادله على فشل هذي التوزيعه الغبيه اولها ان الحين غيروا طريقة حساب الوزن النسبي للعاشر !! انزين دام انكم وعيتوا على العاشر! و الناس الي بـ11 و 12 جهنم وبأس المصير؟ :
مهما كانت وجهة نظر الي موزع النسبه على هذا الاساس فهو مخطأ , عدد حصص العربي 6 ولكن دراسة مادة الكيمياء تاخذ اضعاف وقت العربي وتحتاج تركيز اكثر من العربي وفهم ومهارات وايد غير الحفظ والسرد مثل مادة العربي!
كثير من الناس راح تنظلم وراح توعي انها انظلمت بعد ما يشوف نسبته نهاية الفتره! حسبي الله ونعم الوكيل ,, مالنا غير ربنا ولحد يقولي حرام تدعي عليهم!
الي حطوا النظام ناس (عاقله) تدعي انها تطور اساليب التعليم مفروض كانت تدرس النظام عدل قبل لا تطبقه علينا ونصير احنا فئران التجارب !
في ناس راح تكابر وتقول لاء خوش نظام ومن هالكلام .. اسمحولي اقولكم محد ادرا بحالنا اكثر منا! ولو كنت بـ11 او 12 وعندك ايجابيات أكثر من السلبيات هذي تفضل قولها:
السلبيات:
1) نظام تراكمي = ضغط مستمر لمدة 3 سنوات
ولو سنة من السنين صارتلك ظروف ولا شي وما سويت زين .. راحت عليك الي فات مات
2) 14 مادة علمية .. ابي نظام بالعالم فيه اكثر من هذا العدد في اليونسكو
3) 7 ساعات باليوم يعني بدون راحه لازم غصباً عليك تقعد مفتح 48 ساعه
4) النقطة الي ذكرتها الي اهي ظلم توزيع النسبة او بالاصح هذا الي يسمونه الوزن النسبي
5) الامتحانات متفاوتة الصعوبه بين المحافظات !! تلقى امتحان تييب فيه 35 وانت مغمض وامتحان اذا يبت فيه 25 تحمد ربك وتشكره
6) نظام الغيابات (ليس في كل المدارس) يحسبونك غياب طول اليوم اذا تأخرت عن طابور الصباح دقيقتين ومجموع غياباتك طول السنة 9 وبعدها اقعد فبيتكم
7) يضغطوونك بالامتحانات الي ما تخلص ..
8) احلى شي يوم يقصون علينا ويقولون عندكم مواد اختياريه .. الواحد يعيش جو ان راح ينقي المادة الي يبيها ومستانس ولا كل سنة يقصون علينا يعطونا اوراق اكتب اول وثاني وثالث رغبه ويوم تكتب وتخلص يقطون الاوراق تحت الدرج ويلا الناظر يبي يختارلكم انتو موسيقى و انتو تعامل مع مؤسسات و انتو بدنية و انتو فنيه والي يفتح حلجه ياويله
9) والكثير الكثيييييير ازيدهم لكم بعدين عشان ما تملون هههههه
وبالنهاية آسف على الاطاله واذا بذرت الفاظ مني ,, لكن من القهر بعد شسوي صارلي 3 سنين وانا متحمل وكملوها برفع النسب قبل جم يوم 
ونبارك حق الخريجه وموفقين .. في انتظار آرائكم 
